SHEIKH JA'AFAR MAHMOUD ADAM (Fitowa na (001) Ku sani cewa ita rayuwa ta auratayya, rayuwa ce wadda take ibada, wani fanni ne mai zaman kansa wanda ake bukatar ma'aurata su kasance sun kware a cikinsa, domin su gudanar da shi bisa ga tsari. Mu sani rayuwa ta auratayya babban abin da ta ke ginuwa akan sa ita ce "SOYAYYA". Da dai shari'a ba ta yadda ayi aure ba bisa ga tilas, a shari'a ba tilasta wa namiji ko mace don su auri juna, sai dai aja hankalinta ko hankalinsa har ya yarda ko ta yarda don ta aure shi ko ya aure ta. Shi ya sa lokacin Annabi (S A W) da aka daura auren wata budurwa sai taje wajen Manzon Allah (S A W) cewa: gashi fa iyayenta sun yi mata auren tilas, sai Annabi (S A W) ya ce, mata kina da za6i, ko ki aure shi, ko kuma kice ba ki yarda ba, dole a sake ki". Sai wannan yarinya ta ce: "Wallahi zan iya hakuri zama da shi, amma abin da yasa nayi wannan kara sai don iyaye su ji daga bakinka cewa: basu da damar tilasta wa "ya ta auri wanda ba ta so". Wannan hadisi yana tabbata ce daga bakin Manzon Allah ( S A W). Kuma ku sani ita "Kauna" (Soyayya) sakamakonta ne duniya ta ke zama lafiya. Duk lokacin da aka nemi "Kauna" ko (Soyayya) aka rasa, to sai a dinga samun yawan fadace fadace da kuma yawan tashin hankali.